DISPIACI Si pò capì quantunqua chi quiddu chi fighjola à Via  Stella s’intaressa à a Corsica ! Si devi goda a « Provence » è altri rigioni di Francia  senza sminticà u Marocu o altri paesa chi si poni veda annantu ad altri sceni. Hè com’è pà a radiu pà un quartu d’ora di Corsu ci voli à stà à senta l’ori di sfrancisumu.Piddani i Corsi pà baulli o pà gnuranti ?  J B

DISPIACI Avali chè l’alizzioni sò passati, ugnunu aspetta nuvità o beddi o mali. Dassi di riminu pà attena qualcosa, semu d’accordu mà quandu omu si devi batta dinò pà fallu appiicà ! È quandu i diritta sò rimissi in baddu ! Hè stata cussì pà u Corsu. C’hè da spacinzià da veru ! 

PIACI A lingua Corsa annant’ à internet: A cità d’Aiacciu ha criatu un situ  adrizzatu à i ziteddi pà l’imparera di u Corsu mittindu à a dispusizioni di  i ziteddi , di i parenti e di i prufissiunali, attrezzi pedagogich. Si poni truvà canzoni, ghjochi, storii, listi di paroli, liami ad altri centri di risorsi www.parlamicorsu.com

DISPIACI I scientifichi l’aviani ghjà ditta pà i cupulati di Floride chi poni stirpà a cupulata andemica « cistude », ci sò 150 spezii vigitali invasivi in Corsica chi da qui à u 21OO sarani più numarosi chè l’andemichi.

Trà iddi, u mimosa, u calipitus, piantati à u 19 sèculu, i « griffes de sorcière » piantati pà ritena a rena o imbilliscia i spazia publichi. Mà avali ci sò di più in più: villa di ghjenti vinuti da fora, villa pà a pighjò mà dinò Corsi chi sò di cuddata !

La ghjenti cumpitenti: facini ricirchi, mettini in opara azzioni pà stirpà ‘ssi pianti à mari è à tarra. Mà ci voli ad avè u curaghju di dilla à quiddi chi comprani indè nò è ancu à i nosci: Bastani ‘ssi pianti zotichi ! Rispittemu u locu è a biodivirsità !

                           *

DISPIACI Tutti ‘ssi listi chi prumettini l’eculugia, ci  volini fà piddà u celi pà padedda ! Ugnunu sà chi l’iculugia dumanda monda: travaddu, rispettu, curaghju pà dirranghjà quiddi chi facini i solda. Ùn hè micca una bedda manera di buscassi i vota quandu si faci un travaddu cuncretu è efficaci. Mà si ’ddu omu si voli buscà uni pochi di vota è dà bona cuscenza à la ghjenti i beddi paroli ùn costani nudda !      

Ci sò l’arbetti pà a suppa: finochju, lattaredda, armuraccia…,l’arbetti pà turti è vastelli: nepita, gevi, adda è porra salvatichi... L’arbi pà curà, com’è l’arba sciappa petra, a nocca pà adurmintà un denti carabunatu. L’arbi pà par pascia l’animali, com’è a ghjadducula, i lingui di boiu pà u purceddu, a frasca par i capri…

Ma dinò a spina raza pà uscià u maghjali, a scopa pà i rasti è spazzoli, a murti, u saliciu o u ghjuncu par fà sporti è casgiaghji; a filetta chi ghjova tantu pà tena frischi i frutta è i pesci, pà fà siccà u casgiu, i fica… Guasgi ugni arba o arbureddu ghjova par fà qualcosa o pascia l’animali da a vacca à a ghjaddina tutti t’hani bisognu di l’arba pà campà è fà campà la ghjenti.

 «Annata d’arba »  quandu iddu piovi, « pacà l’arbaticu » à i sgiò cù a robba, i ghjurnati di travaddu o a muneta, « fà pascia l’animali » annantu à i tarri cumunali, era u pinseri di a parti è più di i paisani, pastori cù i bandi o particulari. L’arbi ghjuvaiani à tuttu, l’arba era una richezza ! Avali Diu ni salvi ugni cristianu !À pettu di veda tunda è ritunda i « pelouses », omu passa u so tempu à fà ruzà i mascini è ad aziminà u minimu filu d’arba.

L’arba hè duvintata una calamità !

Ùn si vidi più a diffarenza trà l’arbacci è l’arbi  cussì beddi da manghjà, curà o pascia l’animali. O ghjenti ! quantu trostu ! Quantu  essenza fruzata ! Chì l’arbi sò duvintati arba, arba chi ùn ghjova à nudda fora chè à troscia i pantalona d’inguernu è à piccià d’istati !  

J Branca