Overblog Suivre ce blog
Administration Créer mon blog
12 mai 2009 2 12 /05 /mai /2009 16:48
Eccu  a foto e u contu resu di a sirata di U Scoddu in "Corse-matin" di l'11  05 09




Repost 0
Published by lingua viva - dans cuncursu
commenter cet article
9 mai 2009 6 09 /05 /mai /2009 08:10
                                      Puisia

U petu di zia Ninnina :  Jacky Calistri

L'infernu                     :  Guidu Begnini

Sempre per me           : Stefanu Conca



Eccu a prima puisia

                           U petu di zia Ninnina








Repost 0
Published by lingua viva - dans cuncursu
commenter cet article
9 mai 2009 6 09 /05 /mai /2009 08:01
Eccu i scritti  in prosa primiati pà u 2009

Battì Albertini:               Sintineddi

Augustin Tozzi   :       
L'asinata

J Thomas Cacavelli :  
A lumachedda nera


Eccu u primu racontu

SINTINEDDI

Maghju di u 2010 per sti prati verdicanti di u Castellà, in giru à a chjesuccia di San Brancaziu. I turisti sò ancu à ghjunghje ma oghje, cù stu sole veranile è l’infilarate di e vitture nant’à a RN 198 ci pare d’esse da veru in core di a statina; di lugliu ò d’aostu quandu i ghjunghjiticci ruciti nant’à u portu di Bastia da i batelli s’avvianu tutti ò guasi ind’è un milampu ver di Purtivechju, Bunifaziu è sti lochi sacrificati da i nostri capizzoni à u cunsumerisimu è à u soldu santificatu. Longu à sta strada di l’addisperu ci sò nati cità senz’anima ne core; paisoli s’ellu si pò dì, induve ùn si trova più oghje chè cummerci « di stagione » è stazzione d’essenza da rassicurà u viaghjadore caminendu ver di u so Eldorado

Ma oghje turisti ci n’hè pocu è micca. E vitture provanu à ingarassi dapertuttu, in bor di stradone ò nant’à a stradella di Cap Sud. Pocu u cumbugliu o ghjente !! A chì si letica cù unu chì l’hà furatu u so pezzu di terra croscia da lascià a vittura, à chì s’imbarruffa cù i giandarmi dicendu ch’elli l’anu parlatu male è ch’elli facenu a spacca cù i so spichejtti di sole. Ma chì ci serà di cusi impurtante oghje per ste pianure di a verde Casinca ? Una partita di pallò ? Hè d’un pezzu chì più nimu ci và à perde u so tempu ind’è e tribune triste è sculurite di u Sporting ò qualunque altra squadra. Un intarru ? per una volta micca, ma a sapemu bè chì oghje chì ghjè oghje, certi paesi ùn cunnoscenu l’animazione chì quandu unu di i so zitellu ci voltanu per l’ultimu viaghju. Allora mi dicerete: chì ci serà chì ci face vene a ghjente cumu s’ella ci fussi a calamita ? Lasciate puru a vostra vittura quì è marchjemu inseme una cria da scopre stu miraculu veranile.

Da luntanu, cusi à a prima uchjata, pare difficiule d'induvinà ciò chì si passa. A manu diritta c'è una chjesuccia, à manu manca barraconi di legnu è stand più muderni s’ellu si pò dì ; è dapertuttu ghjente chì gira è volta, volta è gira sott’à i ragi di sole dolce è generosu di stu mese di maghju. Avvicinemuci torna un suppulellu è quì, à mezu à u campu di fiera ci sò e bande di capre è pecure. Hè ora di a tundera. Arrimbati à e chjudende, i zitelli si campanu guardendu l’opera di l’artisti chì cù garbu è manera caccianu a lana di l’animali. Gesti antichi fatti cù e forbice qualchì volta, ò puru cù strumenti oghjinchi. A passione è a maestria di i pastori smaraviglianu i ciucci accumpulati in giru à elli cù i so genitori. A prima vista mi piace stu locu chì mancu ùn m’aspittava à truvà quì stonde sebbiate chì ci ramintanu a Corsica d’eri.

A dui passi di l’animali si compra è si vende di tuttu, ciò chì sdice appena ind’è una fiera detta pasturale cusi ma bò, a sapemu da un pezzu chì u soldu s’hè ficcatu dapertuttu, in ogni locu, in ogni pezzu di terra, ind’è u minimu spaziu induve omu ghjace. Cusi chì si vendenu vestiti, cullane, ghjuvelli ,bracialetti senza gustu. Accampanu u locu famiglie sane da cumpà robba nustrale ò ancu puru rubbaccie industriale, c’è di tuttu! Ancu per manghjà ci truverete i vostri sciali. A ghjente si campa è campa a Casinca, rispira, trimuleghja, festighjeghja è canta dinù…Si canta à pocu pressu dapertuttu à partesi di l’ora di l’apperitivu. Ogni barracone di legnu raprisinta un paese di u circondu, Luretu, A Vinzulasca, U Viscuvatu, U Castellà ò ancu puru qualchì associu cum’è i Cavallieri di Corsica induve ribumbanu e più belle paghjelle sin’à l’alba. A u bancu, ò puru u «comptoir » chì pare assai più capiscitoghju s’è ci riflettimu bè, l’omi i più rozi anu cuminciatu à sbiutà bichjeri è buttiglie senza mancu fà casu à e so corcie donne ch’aspettanu attavulinate è chì cumincianu à risente u freddu chì si ne casca in furia nant’à i più curagiosi. Di maghju a guazza s’imaptrunisce di u locu à bon’ora è corcie à quelle chì t’anu un maritu chì casca ind’è una trappula cù qualchì banda d’amichi in brama di Whisky ò altra bivenda…

Cantanu à voce rivolta pullastroni è anzianetti à ogni scornu di u campu di fiera. L’omi, spinserati u tempu di una serata, intreccianu e voci è incantanu l’appassiunati chì stanu à boccaperta, intrunati da a putenza è a bellezza di stu cantu tradiziunale. In Casinca è in i paesi di a Castagniccia vicina, ci cantanu ancu i zitelli di quatordeci à diciott’anni; u cantu si trasmette sempre per via di a passione cumuna, raprisenta una manera d’esse è di campà chì pare di risità sempre à a sfrancisata feroce, ella stessa trapassata da una mundialisazione funesta. U cantu hè piacè, u cantu hè Libertà, simbulu di una fede paisana spartuta da tutti sti militanti muderni chì campanu sempre ind’è i so paisoli à spessu tralasciati. U cantu hè un patrimoniu immateriale trasmessu per via di a passione, a paghjella hè u sangue di sta ghjente, l’acqua linda di ste muntagne è u suchju d’ogni castagnu chì permettia tandu di mantene u vivu in ogni famiglia. L’omu ch’impaghjella si sfoca, si scorda di tuttu, entre in cumunione cù a so terra è a so ghjente. U cantu ritimava e ghjurnate, accumpagnava è accumpagna sempre oghje l’omu nant’à a so via da ch’ellu nasce nant’à sta terra di tradizioni sin'à l'ora di l'ultimu viaghju.

Tutti eranu dunque in un mare di latte, felici, à cori lebi è cantavanu cù l’anghjuli in sta serata tant’aspittata ogni annu. Tutti ò guasi chì ci n’era unu chì fulminava ind’è u so scornu. « L’ASPETTU ! L’ASPETTU ! » ch’ellu dicia, rossu imbagaritu cù l’ochji di u dimoniu . « L’ASPETTU E L’AGHJU DA FA CAPI QUALE SIMU ! » . Era indiavulatu IVIU è ùn vulia appaciassi. Un c’era l’arte di calmà a so ira chì crescia sempre di più. Più avanzava l’ora è più girava inzergatu ogni barracone in cerca di u Sintineddu. « L’ASPETTU » ch’ellu dicia à mezu à a ghjente stunata è qualchì volta ancu intimurita videndu l’ochji scemi è l’andatura decisa di u nostru amicu. Ancu l’omi i più curagiosi di a pieve u guardavanu passà senza mancu pruvà d’interrompe a so corsa scema. A nutizia era andata lestra è IVIU avia amparatu ch’ellu venerebbe oghje nant’à u campu di fiera unu di i Sintineddi autoproclamati di u cantu in paghjella. Dapoi ùn si pudia più ritene è spazientava, sbullaracava cum’è una pignata. Cume? Un a sapete micca ciò ch’elli sò i Sintineddi autoproclamati di u Cantu in Paghjella? Voi allora mi pare chè vo site à l’anticognu. Allora calatevi quì una cria, pigliatevi un bichjeru ò qualchì migliacciolu è statemi à sente.

Da chì a Paghjella sia ricunnisciuta da l’UNESCO, uni pochi di cantadori avianu messu in ballu un associu da salvà a Paghjella. Pare ancu una bona mi dicerete. Ma ciò ch’ellu ùn avia pussutu acettà IVIU, fra altri, era l’affare di i Sintineddi. Eranu cantadore attalintati, tercani scelti per raprisintà u Cantu in Paghjella è trasmettelu à i più ghjovanni. U prublemu era ch’elli duvianu esse pagati per spiazzassi è per…cantà. Parenu fole ! Avianu imaginatu i capizzoni di l’associu chì i Sintineddi duvianu esse remunerati 1000 aurò à mese per pudè andà ind’è e fiere, parlavanu di rimbursà e spese di spiazzamentu è l’assenza à u so travagliu .Accidenti! 24 000 aurò per dui anni à girà a Corsica è cantà cù l’amichi, què sarebbe forse u più bellu mistieru di u mondu! IVIU ùn pudia suppurtà ch’omu si fessi pagà per trasmette « U CANTU DI I SO ANTENATI » cum’ellu dicia. Ci alluntanemu quì di u Cantu Libertà, di u Cantu chì riunisce e famiglie, a ghjente ind’è i paesi. A paghjella era mutata ind’è un strumentu chì permitterebbe à certi di pigliassi dui soldi, d’apprufittà di una rèdita sacra per fà i so affari stupendu cusi annant’à milliai è milliai di paisani ch’anu tramandatu u so sapè è a so passione…

« L’ASPETTU ! L’ASPETTU !! » ch’ellu dicia sempre IVIU, pedi è mani liati è tinutu for di campu da uni pochi d’amichi chì li vulianu bè. A sapianu ch’ellu avia da fà un scempiu è l’avianu chjappu da ch’ellu ùn fessi una cunnaria. Ci era vulsutu u filu è l’accu da pudeli superallu; sei li eranu cascatu adossu è avianu avutu da attaccallu di fune per immubilizallu. Avianu vintu a battaglia. Oramai IVIU era scantatu, impastughjatu cù una catena di quelle maiò è avianu messu ancu un lucchettu, per esse sicuri. A chjave l’avianu pigliata cù elli è eranu vultati ind’è u barracone per pudè sente cantà u Sintineddu chì quantunque eranu curiosi di vede cum’ellu s’avia da sbruglià cù tutta sta pressione, cù tutta sta ghjente scuntenta è offesa da sta sturiaccia di soldi. « L’ASPETTU, L’AGHJU DA TAGLIA U FIATU ! » ch’elli sintianu alluntanendusi di l’umatale arrabiatu ! « L’ASPETTU E UN V’INCHIETATE CHI UN PUDERA FRANCASSILA ». Parla puru ch’elli dicianu i so amichi, cuntenti di culpacciu ch’elli avianu fattu…

Era ghjuntu u Sintineddu affiancatu di tutta a so squadra : cantadori in terza è bassu, rispunsevule di l’associu è ancu di l'UNESCO, prufissiunali di l’arregistramentu cù tuttu u materiale u più sufisticatu. Ind’è una barracca accunciata apposta cù i soldi di l’UNESCO, avianu cuminciatu à cantà annant’à una scena. Un c’era più nunda di naturale è a Paghjella era cunsiderata cum’è un spittaculu. « Un C’E PIU UN PALMU DI NETTU ! » ch’omu pudia sente s’ellu stinzava l’arechja una cria. Quantunque a ghjente era vinuta è s’era cuncolta daret’à e chjudende piazzate à deci metri per ùn scumudà i cantadori. A folla era zeppa zeppa per ascultà sti paghjellaghji chì si facianu aspittà. Eranu à l’appiattu più in daretu è si priparavanu per a so raprisentazione. I ghjurnalisti di VIA STELLA è Frequenza Mora eranu pronti per l’evenimentu. A manu à manu, esce u Sitnineddu cù i so dui amichi è si mettenu in piazza. « MA COSA HE STA CUMEDIA ?! ». Mettenu à cantà, ò piuttostu à cantichjà. Mai nimu avia vistu un cantadore di Paghjella cusi sticchitu, paria ch’ellu cantava cù una scopa in l’O. Appinzava e labre è n’escia un sonu chjaru, lindu, guasi perfettu ma senza nisun soffiu ! Senza naturale !

A ghjente era guasi per adddurmintassi quandu ad un trattu…un trostu abuminevule feci trasaltà tutti quelli prisenti, un rimore vinutu da u bughju chì s'avvicinava cum'è una minaccia, in furia. IVIU,cù a cumplicità di Battì è Titò s'era liberatu è curria cum'è un torru inghjacaritu, scuffulighjendu cum'è un cavallu spavintatu. Saltò da sopra à a ghjente spavichjata, lestru cum'è mai, è si ritruvò subitu à dui passi di a scena. Dui umatali fecinu per parallu ma si pisconu duie capate tremende è si n'andonu prestu capu inghjò ind'è e canne chì spiccavanu e capanne tra di elle. "T'AGHJU ASSPITTATU U MO CARU!", ch'ellu dissi nanzu di lampassi cum'è un lupu famitu nant'à a so preda sott'à l'ochji di i rispunsevuli santavugliati. Saltò nant'à u Sintineddu ochjiburlatu è missi à strangulallu di tutt' a so rabbia senza chì nimu pudessi più cacciallu. Li stringhjia u ficu senza spustà. U corciu assaltatu diventò rossu, pò biancu, pò verde, passò per tutti i culori d'un arcubalenu senza pudè difendesi. IVIU ùn cappiava è u tintu mughjava. Nascia u parapiglia è tene ind'è a barracca, vulavanu i bichjeri, e buttiglie, e tavule è ancu certi rispunsevuli chì vulianu difende u Sintineddu. A pocu à pocu u so stridu si feci più acutu, paria oramai una voce feminile ! Quandu IVIU lintò a so vittima, si licenziò senza mancu più insultallu. Avia fattu u so duvere; u Sintineddu avia persu a so voce. D'una siconda perfetta si ritruvò cù una terza di curnachja ammalata, scannata à l'usu di certi cantadori di chjam'è rispondi di u rughjone Bunifazincu. Mai più ùn puderà disunurà a Paghjella participendu à SCRUCCUNERIE cum'ellu dicia sempre IVIU. Da tantu ch'ellu funu sbiguttitu i rispunsevuli di l'UNESCO, si ghjuronu d'ùn vultà mai più in Corsica è di lascià cascà a so idea di iscrive a Paghjella à u patrimoniu mundiale di l'UNESCO.
U cantu in Paghjella torna un cantu PUPULARE !!!

Repost 0
Published by lingua viva - dans cuncursu
commenter cet article
6 mai 2009 3 06 /05 /mai /2009 17:05
Eccu u primu premiu  2008  in a catiguria  puisia

   Vogliu Esse    di Stefanu Conca


Allivà vogliu un maghjale,
ingrassarà da par ellu.
Manghjaremu per Natale,
prisuttu è ficatellu.
È di tuttu lu pughjale,
saraghju u solu macellu.
Eppo lascia corre o mà,
faraghju lu pasturellu.

U statu lampa à lampera,
i soldi da lu purtellu.
S'ella mi casca una sposa,
li mettaraghju l'anellu.
Sì ponu tuccà e prime,
s'ellu ci nasce un zitellu.
Eppo lascia corre o mà,
faraghju lu pasturellu.

Vogliu esse un gran' pueta,
per risponde à l'appellu.
À corre in ogni fiera,
per fà sente u mè terzellu.
Cù i tarcani Acqualacci,
Pampasgiolu è Minellu.
Eppo lascia corre o mà,
faraghju lu pasturellu.

Di u gran' Napuleone,
pigliaraghju lu mudellu.
Entre in la cavalleria,
incù lu mè sumerellu.
Cù Fasgianu in prima ligna,
u ghjornu di u duellu.
Eppo lascia corre o mà,
faraghju lu pasturellu.

Andaraghju in Marseglia,
chì per fà u maccarellu.
Aghju dighjà lu custume,
un schioppu è un cappellu.
S'ella viaghja a cumbina,
sarà festa è muscatellu.
Eppo lascia corre o mà,
faraghju lu pasturellu.

Per amparà u marinaru,
è parte cù un battellu.
Cullaraghju in Bastia,
cù lu nostru trinichellu.
À rombu di navigà,
surtaraghju culunellu.
Eppo lascia corre o mà,
faraghju lu pasturellu.

Postu annantu à lu me tronu,
vogliu fà u principellu.
Tutti ghjorni caccighjendu,
in giru à lu mè castellu.
Cusì saraghju da tutti,
cugnumatu "u signurellu".
Eppo lascia corre o mà,
faraghju lu pasturellu.

S'è tù campi in la muntagna,
megliu faci o figliulellu.
Una vita di cuccagna,
à corre apressu à l'agnellu.
Senza cunnosce a macagna,
u disprezzu è lu flagellu.
Eiu lasciu corre tuttu,
fà puru lu pasturellu.

Repost 0
Published by lingua viva - dans cuncursu
commenter cet article
6 mai 2009 3 06 /05 /mai /2009 16:48
 Primu premiu 2008 in a catiguria raconti :

    I preti è u pallò di Antone Acquaviva.

 
Ava ch’elli so scorsi l’anni, mi pare chi vi possu cuntà perche, un ci è piu una partita  di pallo u quindeci d’aostu tra i paesi di San Tumasgiu e di San Petru. Oh, di sicuru, un so micca quessi i veri nomi. Ma, saperete chi, tornu ogni tantu in questa pieve  et un vogliu riceve qualchi bastunate per avè lampatu in piazza, storie un pocu vergugnose chi i vechji vulerianu sminticà. E cume sti vechji so sempre pronti a falle falà, parlaremu, si vo vulete di San Tumasgiu e di San Petru.
 
Oghje, so duie borghi addrumintati ma a l’epica, eranu pupulati e bell’attivi. Ognunu avia a so chjesa e u so prete. A vi dicu, chi stu puntu è impurtante per cio chi a da vene.
 
Dunque, u quindeci d’aostu per l’ « Assunta Gloriosa », ci era a messa di sicuru, e un bellu pranzu e dopu, quandu u caldu era menu forte, versu cinq’ore, una partita tra e squadre di San Petru et San Tumasgiu. Duie o tre ghjorni nanzu, smachjavanu un tarrenu indé un locu situatu a pocu pressu tra i duie paesi. Perche u pallo ? Umbeh, mi pare chi i a reputazione di Sansonetti e di tant’altri ne avia fattu nasce u gustu. Ma era sopra tuttu un manera di sorte in famiglia, di finisce a festa a l’infora e, l’avete capitu, l’assicurenza per quelli ch’avianu da vince di pudè macagna quelli ch’avianu persu. E quessi qui, aspettavanu a so rivincita e tuttu era d’incantu ! Di bellu ghjocu un si ne parlava. U pallo era piu  spessu fora chi nentru e quandu ci era qualchi bellu colpu, era piu l’azardu chi a tecnica. E cume, i ghjucadori eranu piu sgalabati l’unu chi l’altru, i « scopi » per un di « les buts », eranu numarosi e quandu unu marcava, tuccava a l’altru di risponde subitu. Un chjama risponde incu un pallo ! Cusi l’onore era salvu e fistosu l’umore.
 
Iè ma..l’annu nanzu l’affaru chi vi vogliu spiegà, e cose si n’eranu andatu di male. A squadra di San Tumasgiu s’era prisintata incu un novu ghjucadore. A figliola di Battista, maritata in cuntinente, s’era affacata in paese per e vacanze chi vulia prisintà u so maritu a a famiglia. E u ghjovanu, ellu u pallo, un manighjava. Di sicuru, l’avianu subitu pigliatu in squadra quante un’arma sicreta.
 
I Sanpetracci un n’eranu tantu statu da capisce. U merlachjone si tenia a mezzu tarrenu, aspittandu u pallo e appena ricossu, avia corsu sin’ e gabbie di San Petru, schivandu l’unu, evitandu l’altru, squassandu u terzu ..per marcà u primu puntu. U tintu bardianu chi si chjamava Ghjuvan Battista, mancu un n’avia scusicatu. U pullastru cuntinentale curria cusi prestu ch’ellu paria a palla di u fucile e cambiava di direzzione quante un cane chi cerca da parà i calci.
 
Una mezz’ora scorsa, u spusatu ne avia sciaccatu quattru, tutti listessi. I tinti Sanpetracci eranu sfundati  e ci vole da dilla, puru umiliati. E macagne crudele si sentianu. Appuntavanu l’anche ma l’altru, veru fullettu, saltava quante un caprettu. « Incitatelu ! » mughjavanu l’arrabiati di San Petru, fatelu cascà, aio semu a a risa….Ma un ci era nulla da fà. U tipu senza capisce ch’ellu pigliava belli risichi cuntinuava a fali scimisce. Pocu nanzu u mezzu-tempu, torna un puntu ! Ghjuvan Battista era surtitu di a gabbia quante un scemu, l’anche aperte chi parianu  furbici per taglialu ma stu diavulu di ghjucatore l’avia schivatu una volta di piu. Avia fattu passà u pallo tra l’anche di u so adversariu  e in vece di stà zittu, avia mughjatu in francese « Petit pont ! !».. Pare ch’ellu seria cusi ch’omu chjama stu colpu particulare.. Ma..Ghjuvan Battista u francese u capia a pocu pressu quante lu capia u pallo. Puru male ! I spettatori l’avianu intesu mughjà « m’a trattatu di petit con » prima ch’ellu saltessi nant’a lu tintu disgraziatu per sciaccali una frambata di ligenda.
 
L’azzufu era statu generale chi i San Tumasginchi s’eranu subitu affacati per aiutà. Di sicuru i San Petracci un l’avianu lasciati fà chi eranu puru nervosi .L’arbitriu, prim’adjuntu mi pare, chi vulia fà u paceru s’era fattu tribbià anch’ellu e tutti, ome e donni, vechji i zitelli s’eranu techjati di colpi, di schiaffi,  pilatoghje e altri  calci. A partita s’era arristata subitu ma tra i duie paesi, l’ambiante era divintuta puzzicosa.
 
I ghjorni, settimane e mesi dopu, ogni volta chi l’unu o l’altru si truvavanu, una macagna di troppu, una parullaccia e torna a Vignale..baruffa. U peghju era per stu tintu Ghjuvan Battista, v’arricurdate u bardianu, ch’un pudia vede un Sanpetracciu senza sentesi dumandà, s’ellu era passatu per u « petit pont ». In francese, incu l’accentu pinzutu ! Un girava piu u cantone e un parlava chi di vindetta. Vindetta ! A partita da vene, prumittia di esse sanguinosa.
 
Pochi ghjorni nanzu quella rivincita, i duie prete, Prete Ghjuliu di San Petru e Prete Marcu Maria di San Tumasgiu s’eranu pigliatu apputamentu. D’accusentu per una cosa..ci vulia ch’ella tornessi a pace. Prete Ghjuliu s’avia pinsatu una cosa . Spieco a u son cumpare chi per impedisce l’inciuffate, tuccava a ellu di arbitrà. A ghjente un osaria mai proferi ghjastemi,  cumincià qualch’intuppu in presenza di un prete e sopra tuttu, un cuntestarianu mai e so sintenze, a ellu chi riprinsitava quantunque u Signore nant’a sta terra.
 
 Prete Marcu Maria era d’accusentu ma e regule  di u pallo un ne cuniscia manc’una acca. Un face nulla, ô cumpa, li rispundo tandu Prete Ghjuliu. U to sacristanu, stu bravu Pasquale, ellu i cunosce e regule, chi a ghjucatu a u pallo quand’ellu era a u liceu in Bastia.  Eppo sera vicinu da u tarrenu mentre a partita. Basta, chi quandu un sai micca cio chi tu ai da fà, chi tu pesi u ditu cume si tu dumandava l’avisu di Diu, e a tempu fighjularè prestu prestu a Pasquale, chi ellu ti fara capisce incu lu manu, a dicisione ghjusta ch’ellu ci vola da piglià. Quale a da criticà u ghjudiziu divinu ?
 
U quindeci d’aostu, incu un silenziu pisante, e duie squadre s’eranu prisintate. U cuntinentale s’era fattu scusà. Una scruchjetta assai diplumatica, diceremu. E squadre belle nervose avianu cuminciatu a partita, per un di u scontru, appuntandu piu vulinteri i schinchi chi u pallo. Subitu, Prete Marcu Maria avia adupratu a tecnica spiegata per Prete Ghjuliu. Faccia nice d’invucà u celu ma agguardava di sottu u sacristanu chi, discretamente, li facia vede u veru culpevule e li sussurava a decizione. L’arbitru, dunque, un si sbagliava mai o pocu.
 
Ma, i San Tumasginchi, un ci vole micca a pigliali per scemi. A sapianu bè, chi u so prete, a u pallo u ci cuniscia nulla. Avianu capitu bellu prestu chi l’arbitru un era micca in celu, ma indè u so gruppu. S’eranu tandu avvicinati di u tintu sacristanu e li avianu fattu capisce incu belle pittughjate induve si truvava u so interessu. Pasquale, di Corneille u scrivanu francese un ne avia mai intesu parlà. A curnachja era per ellu st’acellu neru chi vola in banda a sera vicinu a a petra di l’Arimone. Ma, a so scelta corneliana, si omu si po di,  fu prestu fatta. Tra una concia e e regule, un ci era tantu da scumbatte. E cusi, a sapete ch’ellu si torce spessu u nasu di a ghjustizia. E pianu, pianu, l’arbitratu di u Prete era divintutu assai urientatu. Pudianu fà cio ch’elli vulianu i San Tumasginchi, Prete Marcu Maria pisava u ditu e li dava sempre raggio ! I Sanpetracci eranu casticati quand’elli minavanu ma dino quandu li ricivianu. E piu viaghjava l’affaru, piu ne pigliavanu.
 
 
Prete Ghjuliu un cuniscia nulla a e regule ma ancu un cecu si seria avvistu chi l’inghjustizia s’era impatrunita di a partita. Era ancu impauritu in veru chi st’inghjustizia si pigliava a forma uffiziale di un decretu divinu annunciatu da un prete !
 
L’abitanti di i duie paesi anu tandu vistu una cosa incredibile ! Un prete saltandu in furia nant’a u tarrenu, agguantandu un altru prete per techjalu di colpi  mughjandu a tempu « ti ne era rimessu a Diu e ava se in manu di Satanassu ! ! » L’altru ch’un pudia capisce ch’avia sempre seguitatu i cunsigli di u sacristanu, un s’era micca lasciatu fà. I duie prete si vultulavanu, cimicandusi, fragandusi..basta..un azzuffu di quelli. Vergugnosi, i paesani l’avianu, in fattu fine, separati et ognunu era turnatu in casa soia..a a mutesca.
 
Ninsunu un vulia piu sente parlà di st’affaru ch’un seria surtitu di u cantone ma Prete Ghjuliu, sicuru di qualchi colpu di u diavulu, si n’era falatu in Aiacciu per dumandà a u sgio Vescu ch’ellu sia fattu un scunghjuramentu per  u so cumpare. Monsignore X, amparatu dopu une inchiestra, avia allora pruibitu chi u pallo, strumentu di discordia, sia torna praticatu in questa regione. Avia dino ordinatu a i duie preti di fà penitenza e di racunciassi. Ma a verita cumanda e so obligati di di chi, u si so piu parlatu sin’a so morte.
 
Repost 0
Published by lingua viva - dans cuncursu
commenter cet article
3 mai 2009 7 03 /05 /mai /2009 23:14
  
Sirata di U Scoddu

            
Scritti da rida
    stodii da cuntà

       NATALI VALLI 
           E                   GHJACUMU CULIOLI

                è i so dischi da cumprà

                                          in portivechju


Vennari 8 di maghju à 9 ori di sera

Casa san  Vincenti ( presbytère)


                            Ci sarà da bia è da manghjà

             
Repost 0
Published by lingua viva - dans cuncursu
commenter cet article
2 janvier 2009 5 02 /01 /janvier /2009 20:07

 




I
)A rivista u Scoddu pruponi un cuncursu di scritti ridiculi apartu à tutti i genari: struffetti, stalvatoghji, raconti, puissi, sceni...satirichi o comichi.

 

II) Ci sarani trè ghjurii, unu pà ugni sizzioni : 1) Scritti da rida in lingua corsa pà i maiò: Puisia è prosa spiccati.

2) Scritti da rida in lingua Galluresa 3) Scritti da rida pà i ziteddi (scoli, culleghja, licea) ‘Ssi ghjurii sò cumposti di: scrivani , di ridattori di u Scoddu, d’insingnanti.

 

III)’Nanzi à u 25 d’aprili di u 2009, si pò invià una sola opara, da una à cinqui pagini, pò essa ghjà stata ghjà piublicata ma micca primiata , pà cuncurrenti. Metta u nomu annantu’à una pagina spiccata. U nomu di u scrivanu o di a scola sarà datu dopu a scelta di a ghjuria. 
                 

IV) L’opari poni essa publicati da u Scoddu quandu iddu li pari.

V) Invià i scritti da rida pà currieri à: u Scoddu i Fossi 20137 Portivechju o pà e-mail: uscoddu@yahoo.fr ‘nanzi ad u 25 d'aprili 

VI) A rimissa di i premia si farà cù un scontru culturali in Portivechju à una data da pricisà.

Repost 0
Published by lingua viva - dans cuncursu
commenter cet article
5 octobre 2008 7 05 /10 /octobre /2008 23:55

QUARTU  CUNCURSU  DI  SCRITTI  DA  RIDA  DI  U  SCODDU

 

                      RECULAMENTU DI U CUNCURSU     

I A rivista u Scoddu pruponi un cuncursu di scritti ridiculi apartu à tutti i genari: struffetti, stalvatoghji, raconti, puissi, sceni...satirichi o comichi.

 

2 Ci sarani trè ghjurii, unu pà ugni sizzioni : 1) Scritti da rida in lingua corsa pà i maiò: Puisia è prosa spiccati. 2) Scritti da rida in lingua Galluresa 3) Scritti da rida pà i ziteddi (scoli, culleghja, licea) Ssi ghjurii sò cumposti di: scrivani , di ridattori di u Scoddu, d’insingnanti.

 

3 ’Nanzi ad aprili di u 2009, si pò invià una sola opara, da una à cinqui pagini, pò essa ghjà stata ghjà piublicata ma micca primiata , pà cuncurrenti. Metta u nomu annantu’à una pagina spiccata. U nomu di u scrivanu o di a scola sarà datu dopu a scelta di a ghjuria. 

                  

4 L’opari poni essa piublicati da u Scoddu quandu iddu li pari.

 

5 Invià i scritti da rida pà currieri à: u Scoddu i Fossi 20137 Portivechju o pà e-mail: uscoddu@yahoo.fr ‘nanzi ad aprili.

6 A rimissa di i premia si farà cù un scontru culturali in Portivechju d’aprili di u 2009.

 

Repost 0
Published by lingua viva - dans cuncursu
commenter cet article
27 août 2008 3 27 /08 /août /2008 08:01



Da aprili di u 2006 U Scoddu, urganizighja un cuncursu di scritti da rida  apartu à tutti i genari : struffetti, stalvatoghji, puisii, raconti, sceni... Ci so parechji sizzioni:  Una sizzioni pà a lingua corsa d’ ugni locu è una pà u Galluresu, po una
sizzioni pà i ziteddi (scoli, culleghja, licea).
Pà u 2009 aspittemu a voscia participazioni !

Repost 0
Published by lingua viva - dans cuncursu
commenter cet article

Présentation

Recherche

Liens