Overblog Suivre ce blog
Editer l'article Administration Créer mon blog
27 août 2008 3 27 /08 /août /2008 11:51
    .

                                                           Siconda parti

 

 

              Sapemu dighjà chi u Visconti Charles André de Maimbourg era maghjori Cumandanti

di a piazza di Bonifaziu (sempre in1788).Era prutettu da u Tinenti Ginirali de Marbeuf, Guvirnatori di a Corsica.Di fatti, u nosciu paesu era tandu suttu à  guvernamentu militaru( 1768-73 è 1788-90).

               Cussi de Maimbourg un' ha avutu tanti difficultà a uttena a cuncissioni di u « Procojo di

Santa Giulia », duminiu immensu.

                Ma, par sfruttà  quissi tarri, ci vulia a manu opara. Maimbourg hè andatu dunqua a veda

a ghjenti di a Pascialedda di u Pricoghju par fa li pruposti.

                Si trattaia nanzi tuttu di middurà i cundizioni di vita di i pastori, chi, di fatti, abitaiani capanni di petra sciolta cuparti di suaru.Tuttu saria custruitu in ghjru di a sò propria abitazioni,

(à usu medievali), chi era una grandi casa di petra zuccata è arranghjata, chjamata sempri oghji

« u Palazzu ».Si poni sempri veda i sò ruvini è pezza di mura, chi, dopu à a morti di u Visconti,

u Palazzu hè statu smantillatu è i petri riaduparati, fora che i più pisii, firmati in locu.

                 L' omu affirmaia di avè a vulintà di valurizzà u tirritoriu. A pupulazioni, poca curiosa di

intinzioni piatti pussibuli di u parsunaghju, era intarissata. D' altrondi, Maimbourg era sempri ben'

ricivutu quand' iddu facia visita, è ricunnisciutu com' è simpaticu.

                 Cussì, i pastori l' hani rispostu chi, prima di dicida, li tuccaia di cunsultà i sgiò priputenti

di u locu.

                 Mà, quandu Maimbourg hè vultatu par senta a risposta, l' accuglienza un' era più quidda.

I priputenti, pocu primurosi di favurizzà un cuncurrenti aviani manuvratu a pupulazioni: un ci vulia

da fidassi di Maimbourg chi era una spia di Marbeuf.

                 U Visconti un s' hè cunsidiratu vintu.Alora, in u mentri di i sò visiti, a ghjenti facia

brusgià u listincu par infumica lu e fà lu scappà.

                 E pò, in quisti cundizioni Maimbourg s' hè scuraghjitu....

                 Sìa com' idda sìa, l' affari di Mamburgu, comu iddu era chjamatu, ha di sicuru funziunatu.

Parchi, in più di u Palazzu, opara cunsiquenti in impurtanza e in qualità, avia fattu fà un fragnu in u taddu di Chitebbiu (a sò macina hè sparita) cun, vicinu, una bella casetta.

               « In ortu di u mè missiavu, ci dici Vincenti Ciabrini, c' era un furru par fà cocia i coppi è i mattona.E ci sò i tracci d' un altru furru daretu à a casa. Un c' è tantu, si vidiani sempri mori di mattona accatastati in quiddi tempa ».

                Si sà chi u duminiu di Santa Ghjulia hè statu vindutu à l' asta in tempu di u Cunsulatu.

Mà si dici purtantu chi Maimbourg sia mortu in u sò Palazzu.

                Sapendu lu muribondu, a ghjenti hè malgradu tuttu andata a veda lu.

                Avia persu l' usu di a parola, mà rifacìa sempri u stessu gestu: i tre prima dita di a

mani puntati com' è i tre peda di un brandali.

                Quissu gestu era firmatu un misteru...

                Sin'à a fini di u XIXu seculu, quandu  un lavuratori di a Pascialedda, vultatu da u sò chjosu, avia musciatu una pignatta di fonti cun tre peda, un cacau. Dicià d' avè lu truvatu in un furconu d' alivi... E subitu dopu s' era cumpratu una casa in Portivechju e  criatu una impresa di carbonu, intarissanti tandu, par via di a navigazioni à vapori.

                Alora a voci pupulari ha spartu subitu, è si dici ancu oghji, chi: « A.P.a truvatu un

cacau, mà un era mica biotu, c' era in drintu a furtuna di Mamburgu »...

 

              Tanti ringraziamenti à Vincenti Ciabrini di u Pricoghju, par avè ci fattu cunnoscia

               cun tanta amabulità, ciò chi a mimoria ha trasmissu di u Visconti de Maimbourg.

                                                                                              

                                                                                                             G.M

 

Fonti: F. Pomponi in Etudes Corses n° 30.31(1988)

          è Porto-Vecchio tempi fà. CACEL (1992)

 

Partager cet article

Repost 0
Published by lingua viva - dans articuli ridattori
commenter cet article

commentaires

Présentation

Recherche

Liens