U SCODDU

Lettu annantu u blog A PIAZZETTA

Da leghje dinù...

Senza muntà ci a sega, a sapimu chì ghjè a Piazzetta a vostra lettura favurita! Hè per quessa chì ùn simu mancu appena intimuriti da a cuncurrenza. Vi prisentemu quì unepoche di letture chì vi pudete abuchjà s'è vo'site à l'oziu. Ma attenti, state ci fidi quantunque !

A Nazione

In u numeru di stu mese, ci pudete ritruvà :
- una testimunienza di Ghjacumu Fusina è di Maria Teresia Poli nant'à l'evenimenti francesi di maghju 68
- un intervista d'Edgar Morin, u famosu sociologu francese chì hè ghjuntu à l'Università di Corsica pocu fà.
- a crunichetta di Petru Vachet-Natali
- un articulu di Ghjacumu Thiers nant'à a literatura in Bastia
- un articulu di Maria Teresia Poli nant'à "una verità chì disturba", u filmu d'Al Gori o Gore?
- un articulu legeru di Sébastien Quenot nant'à a "lingua light"
- un articulu propiu bastiacciu di Ghjermana de Zerbi nant'à a santa cruciata ch'ella vissutu per caccià "l'almanaccu di Bastia"...
- a cronaca storica di Francesu Maria Perfettini nant'à a republica
- un articulu di storia di Diunisiu Luciani nant'à Sambucucciu
- un articulu d'un certu Sgaiuffu (?) nant'à i pippol...

Bonanova

Da signalà chì si festighjeghjanu i dece anni di a rivista di a squadra di u Centru Culturale Universitariu postu chì ghjè u vintesimu numeru! Ch'ella durghi !

Ci truverete :
- U cap'articulu di Dumenica Verdoni dedicatu, "cun tristezza" à u pueta martinichese Aimé Césaire
- Creazione literarie, per u più impinatelle da studienti, prufessori di l'Università ma dinù pueti di tutte e mamme
- Critiche literarie è note di lettura ridatte da prufessori
- A cronaca "Sò nati" chì presenta l'ultimi scritti nustrali
- I Sussuri in giru à stonde culturale
- A cronaca "Scunfini" nant'à pueti furesteri chì spartenu cun noi u suchju di a latinità

A Pian d'Avretu

Quessa a rivista ci rigala un intervista di u scrivanu Santu Casta. O si di nò, ritruvemu listessa squadra di prima trinca incù, frà altri mani d'opera, Marcu Biancarelli, Didier Rey, Jérôme Ferrari, Paulu Desanti... Literatura, pulitica, storia, tuttu ci passa, da Pasquale Paoli à Simone de Beauvoir, in corsu è in francese!

Avali

Hè a rivista di l'associu Matina Latina di Rinatu Coti è Marceddu Jureczeck. Ci pudete ritruvà un testu tremendu di Farrandu Ettori scrittu in u settanta : "Populu, naziunalità, nazioni, per una rivalutazione di a storia di a Corsica".

U Scoddu

Hè u misincu di "cultura è d'infurmazione" cacciatu da l'associu lingua viva incù Marcu Ceccarelli, Guy Cucchi, Ghjaseppu Melani, Augustin Tozzi, Natali Valli, Marie-Claude è Jacqueline Branca... Cum'è tutte e riviste mintuvate quì sopra, meriterebe d'esse di più cunnisciuta è ricunnisciuta.

Aspettendu i numeri à vene, vi pregu una bona lettura à tutti !

Mercredi 11 Juin 2008

Sbanditu